મુવો માથાનો ભટકાણો, મુવો માથાનો ભટકાણો
કાયમ કનડે કાળમુખો, કંથ કજાત્ય કપટી કાણો..માથાનો ભટકાણો

દસ દાડા જ્યા દુર જાઊ ત્યા થા’તો ઇ રઘવાયો
કામ નો કુટ્યો ધણખુટ્યો મારો મેલે ના પડછાયો

પાછળ પાછળ ફરતો મારે પ્રારબ્ધે પડીયો પાણો..માથાનો ભટકાણો

ભાર્યા ભાળીને થાય ભુરાયો ભાગ્ય તણો ભમરાળો
ભદવો ભેંટ્યમા ભીંસતો ભુંડો . ભંભોળ ભૂખરવાળો

મલકમા ન સચવાતો મારી સોડ્યમા શે સચવાણો..માથાનો ભટકાણો

એદી અદોદળ અથરો અકોણો અક્કલનો ઓથમીર
બાયડી પાસે બકરુ બનતો ભારે માયલો ભડવીર

’હિમ્મત’ સરખો ધણી પરણીને ભવ મારો રોળાણો..માથાનો ભટકાણો